హృదయపు సందేహం

నే చూడాలనుకున్నా..
తీర్చుకోవాలనుకున్నా..
నా ఆలోచనల మాటున
అణిగివున్న సందేహాలను

పగలు రాత్రి మధ్య..
గీతేమైనా ఉందాయని..
రాత్రంతా మేల్కొని చూశా..
కన్నులార్పకుండా కాపువేశా
కాని కానరాదే.. తెల్లారింది కూడా
అప్పుడే అర్థమైంది
భళ్లున తెల్లవారదు,
హఠాత్తుగా పొద్దుకూకదు.
పగలు రాత్రికి మధ్య గీతేమీ లేదని

మొగ్గ పువ్వుగా ఎలా వికసిస్తుందో..
వీక్షించాలనుకున్నా
దాని ముందే చాలా సమయం గడిపా
మొగ్గ వికసించిందే కాని..
నా హృదయపు సందేహం వికసించలేదు
అప్పుడే తెలుసుకున్నా అది హఠాత్పరిణామం కాదని

శిశిర వసంత రుతువుల మధ్య..
నిముషాన్ని వీక్షించాలనుకున్నా
చెట్లు చిగురించాయి వసంతం వచ్చేసింది
కాని ఆ నిముషం నే గుర్తించలేకున్నా

సముద్రపుటంచున నింగి, నీరు
కలిసిన చోటును వెతుకుతూ బయలుదేరా
నా పయనం సాగుతోంది..
కొనసాగుతోంది గమ్యం లేకుండా